内容介绍：生：【雪中行引子】心驚驚！ 旦：【插白】哎吔，裴郎，你使乜咁驚唧你？ 生：乜唔驚呀？ 旦：【接唱】我辭閻羅。【白】嗱，你跟住我就唔使怕架啦！ 生：【接唱】慌得我，過山坡。影一個，歷災磨。今晚風風雨雨，我怕隔斷銀河。 旦：【接唱】你陪陪伴伴我，願終身嫁哥。 生：【插白】我死都跟住你架啦！ 旦：【接唱】憶我死在邪魔呀，幸得香魂借屍嫁哥。【插白】我借屍還魂，與君結合啦嘛。 生：係唔係架？【接唱】惟有癡心相盼，未得昭容，實惹疑心一個。【南音長序襯白】阿……阿慧娘，慧娘！慧娘！慧娘！嘿！乜你又走邊處呀？嚸解你唔睬我架？哎吔死啦！我冇咗你我搞唔掂個喎！哎吔！慧娘！慧娘！ 旦：裴郎！ 生：哎，攞命啦！ 旦：我喺呢一度呀裴郎！ 生：嘿！你出聲至得架！等我隨處咁搵你。嘿！我冇你冇收架嘛！你咪行“孭”呀！嗱，跟住啦。【南音】因為你聞聲就唔見影呀，真係嚇壞了情哥。若然失散，試問我都如何？ 旦：【接唱】只為裴郎，你忘記我。 生：【插白】乜忘記你呢？ 旦：【接唱】你遮未開時， 生：【插白】呀！係噃！ 旦：【接唱】手未拖。 生：【插白】呀！我唔記得。【接唱】等我把紙傘，張開，我就來遮妥呀。引導你嘅靈魂借月，今夜過，呢度銀河。係呢，【減字芙蓉】請問何處是香閨？阿慧娘你指示我。【插白】究竟喺邊處，你帶我去啦！ 旦：【接唱】盧昭容繡閣，你緊記便無訛。 生：【插白】盧昭容繡閣，與你又何干呀？【接唱】她不是係慧娘，喂，你所言係一定錯。 旦：【插白】我講冇錯到。【接唱】因為借屍成好事，才不負情哥。 生：阿……慧妹呀，【滾花】人亡又焉可再重生？【插白】借屍還魂必無此理嘅！嘿，你叫我嚸信呀又？ 旦：哦，噉你唔信呀？ 生：唔信定啦！ 旦：【接唱】皆因為玉帝閻王恩準我。 生：【老鼠尾序】天也助，鬼也助，但願你共我、共我隨唱同離禍。 旦：你應遮我，拖我同你共過斜坡。 生：嬌你隨行休再延俄。咦！不見慧娘我心裏又呀又嚇傻！慧娘？ 旦：【接唱】哥哥，哥哥，我在後頭， 生：【插白】你出聲至得架！ 旦：【續唱】未轉山坡，似成拃鬼跟我！ 生：【白】嘩！成拃咁多呀？ 旦：係囉。 生：你千祈唔好嚇我呀！嗄！你唔好嚇我呀慧娘！【雨打芭蕉】驚聽得慧娘在山、山坡過，乜你偏偏延俄？還望快過，你能、能隨我， 旦：【接唱】我不敢過，你望下有冤鬼一個。佢阻擋前途，還重向我，佢調情我，周身冤氣嚇壞我。佢話在陰司完全都未曾有老婆。 生：【接唱】哦！哎吔氣壞了嬌娥。你個裴郎都被你嚇傻。噉請問如何、如何方可？ 旦：【接唱】好采得見陰司差哥， 生：【插白】噉嚸呀？嚸呀？ 旦：【續唱】馬面牛頭來助我， 生：【插白】噉好囉！好囉！ 旦：【續唱】拉佢落陰曹將監坐。 生：【插白】真係鬼咁鹹濕，真係冇錯！ 旦：【續唱】將佢嚴辦受災磨。請哥哥開傘帶住我。 生：嘿，噉我就慌過咗囉！【二黃】與嬌玉手，兩相拖，忙向小橋，重度過。不畏登山涉水，不畏渡銀河。嬌是係癡情，鬼一個。唯是借屍，還玉魄，此事真費煞，商磋。真使我疑雨疑雲，望嬌你坦言，嚟告我。 旦：【白】等我講你聽啦裴郎。【反線中板】記得初會，柳橋邊， 生：【插白】做乜呀又？ 旦：【續唱】郎你抱琴還帶笑；奴亦暗送，秋波。 生：【插白】你重記得。 旦：【續唱】一笑竟，生情，花落始逢君，一段癡情，竟被人窺破。 生：【插白】唉，都係整定囉。 旦：【續唱】太師辣手，摧花。慧娘魂離棒下，謝君到紅梅閣，祭嬌娥。 生：【白】噉我應該嘅嘛。 旦：【滾花】我倆生死牽情，才有得借香屍，延愛火。【三疊愁序白】愛情係好偉大嘅，愛到深，情到真嘅時候，就可以感動天地嘅啦裴郎！【三疊愁】當初情字，遇災磨，此是二人因果。無術補情天，使我桐棺臥。驟來風雨劫，至令難結絲蘿。【插白】卒之我魂歸地府，都重共你生死情牽，後來我以至情感動咗閻君，故此得到紅梅復活啦。 生：係呀！【續唱】再生為伴，鬢廝磨，心上便無痛楚。 旦：【插白】噉你而家安樂啦？ 生：【續唱】鴛侶還陽，甜蜜勝當初。令紅梅再世，美麗籠罩山河。【插白】慧娘，借屍還魂係千古奇事呀。 旦：裴郎，此生復合係千古奇緣呀。 生：噉謝天， 旦：謝地， 合：謝愛神！ 旦：【續唱】今宵明月，照天河。 生：【接唱】非共並頭，不可。 旦：【接唱】同心兼合力， 生：【接唱】戰勝了邪魔！ 旦：【接唱】我願郎，你歡笑下囉。 生：【接唱】以後常對嬌娥。【反線中板下句】講到借，香屍，我又疑雲疑雨，從來都不信，有閻羅。 旦：【插白】你唔信呀？真係有架！ 生：【續唱】呢我更，不關心，妹你是鬼呀是人，但望你始終，能嫁我囉。就算你係鬼夫人，我亦如常恩愛，做一對人鬼，唱情歌。【滾花】呢你何必借昭容玉體慧娘魂，你強說還陽，來顛倒我呀！ 旦：【白】照理講呢，就係人鬼之戀，虛無飄渺，又嚸能夠同你生兒育女呢？ 生：噉嚸呀又？ 旦：你聽我講啦。【二黃】你想唱愛情歌， 生：【插白】噉嚸呀？ 旦：【續唱】必須人兩個。 生：【插白】噉而家咪兩個囉！ 旦：【續唱】一人一鬼，又怎諧和。 生：【插白】乜唔得嘅咩？慳番米飯呀嘛！ 旦：【續唱】盧氏昭容，佢顏似我。 生：【插白】哦，好似你架？ 旦：【續唱】附之魂魄，妙如何。 生：【插白】都唔知得唔得嘅啫？ 旦：【續唱】你何必多疑，喺處追問我。我明朝便復活，你要替我， 生：【插白】我替你乜呀，嗄？ 旦：【續唱】細畫雙娥。 生：【插白】係囉，唏！噉而家到未呀？ 旦：呢度就係啦。【續唱】正是這所紅樓， 生：【插白】哦，呢間呀？ 旦：【續唱】見不見香屍？ 生：【插白】等我裝下先。呀！係呀！係呀！ 旦：【續唱】橫臥？ 生：【白】係呀！ 旦：係啦嘛？ 生：【滾花】喂，噉你就快啲借香屍，還玉魄，你向郎開口，就喚情哥呀！ 旦：好啦！【續唱】如君命，即還陽。輕叫裴郎，你扶起我。 生：【白】呃！哎吔！慧娘， 旦：裴郎！ 生：真嘅你呀！你而家生番囉！哎吔，我真係開心囉！【滾花】正係復活紅梅香萬世，呢個裴郎喜極，我作狂歌呀！

库首 上一个 下一个 库尾 回目录 关闭